Cymdeithas Tai Hafod yn cynnal archwiliad sgiliau digidol CDC i hybu trawsnewid digidol

Mae Cymdeithas Tai Hafod a Cymunedau Digidol Cymru: Hyder Digidol, Iechyd a Lles (CDC) wedi dod at ei gilydd i ymgymryd â dull sefydliad cyfan o gynnal archwiliad sgiliau digidol i ddeall sgiliau digidol sylfaenol a hyder cydweithwyr Hafod. 

Yn 2021 lansiodd Hafod eu strategaeth trawsnewid digidol gyntaf a buddsoddi mewn swyddfa trawsnewid digidol bwrpasol sy’n gyfrifol am yrru eu hagenda trawsnewid digidol yn gyflym, gan ddarparu atebion digidol arloesol i ddiwallu anghenion eu cwsmeriaid a’u cydweithwyr. 

Yn arwain ar ran Hafod mae Dave Bodger, Rheolwr Rhaglen a Thrawsnewid Digidol. Gan ddweud mwy wrthym am y bartneriaeth, dywedodd: 

“Roedd yn amser cyffrous i ymuno â Hafod, i wneud newid gwirioneddol a chael effaith gadarnhaol ar y ffordd rydym yn gweithio, gyda chanlyniadau sydd o fudd i gydweithwyr a’r gwasanaeth y mae ein cwsmeriaid yn ei dderbyn. 

“Fel rhan o’n strategaeth trawsnewid digidol, rydym wedi datblygu cynllun hyfforddi llythrennedd digidol wedi’i gynllunio i uwchsgilio pob cydweithiwr ar draws y sefydliad.” 

Gan ddefnyddio archwiliad sgiliau digidol ar-lein a ddatblygwyd gan CDC ac yn seiliedig ar Fframwaith Sgiliau Digidol Hanfodol y DU, gofynnodd Hafod i gydweithwyr roi adborth gonest i gyfres o gwestiynau am eu llythrennedd digidol personol fel y gallent ddeall sgiliau digidol a lefelau hyder cydweithwyr yn well, a fyddai’n helpu i lywio’r cyfleoedd dysgu a datblygu sydd ar gael iddynt. 

I gefnogi’r ymchwil, benthycodd CDC 11 iPad i helpu i ymgysylltu â chydweithwyr sydd fel arfer yn anodd eu cyrraedd ar-lein oherwydd natur a lleoliad eu rôl. Bu hyn yn llwyddiannus a helpodd i gyflawni cyfradd ymateb o 32% yn gyffredinol, gan roi mewnwelediad o ansawdd gan 384 o gydweithwyr unigol ar draws holl gyfarwyddiaethau Hafod. 

Yn dilyn canlyniadau’r archwiliad sgiliau digidol, mae Hafod a CDC wedi cydweithio i ddatblygu strategaeth ar gyfer y camau nesaf. Mae argymhellion CDC a mewnwelediad arfer gorau wedi darparu golau arweiniol i greu amgylchedd cynhwysol i gynyddu sgiliau digidol a hyder ar draws y sefydliad. 

Mae hyn yn cynnwys rhwydwaith o Hyrwyddwyr Digidol a grëwyd yn ddiweddar, sy’n cynnwys cydweithwyr sydd â diddordeb mewn technoleg, y Rhyngrwyd, a phopeth digidol. Maent yn angerddol am rannu eu gwybodaeth a chefnogi cydweithwyr ar draws y sefydliad i sicrhau’r canlyniadau gorau posibl i gwsmeriaid a chydweithwyr fel ei gilydd. 

Wrth siarad am y gefnogaeth a dderbyniwyd gan CDC, dywedodd Dave: 

“Mae CDC wedi bod yn hynod gefnogol trwy gydol ein cydweithrediad hyd yma. Mae gweithio gyda thîm sy’n rhannu’r un angerdd am drawsnewid digidol wedi bod yn wych ac rwy’n argymell sefydliadau eraill sy’n elwa o’u gwybodaeth, eu profiad a’u hadnoddau.” 

Mae archwiliad sgiliau digidol yn gam cyntaf gwych i sefydliadau sydd am roi newid digidol ar waith neu ddeall a mynd i’r afael â gwahaniaethau mewn gallu digidol yn well. Wrth siarad am yr help sydd ar gael, dywedodd Cadi Cliff, Rheolwr Rhaglen Cymunedau Digidol Cymru: 

“Mae’r gefnogaeth a gafodd Hafod gan CDC ar gael am ddim i bob sefydliad yng Nghymru sydd eisiau deall galluoedd digidol eu staff neu wirfoddolwyr. Mae’n arf hollbwysig i sicrhau bod y cyfleoedd dysgu a datblygu sy’n ymwneud â sgiliau digidol a hyder a gynigir gan sefydliad yn cael eu hadeiladu o anghenion eu gweithlu, ac nid o ragdybiaethau. Os ydych chi am gymryd y cam nesaf i gefnogi ac uwchsgilio cydweithwyr i fod yn fwy hyderus yn ddigidol fel y gallant gefnogi eu hunain yn y ffordd orau, eu cyfoedion, a’r rhai y maent yn gweithio gyda nhw, cysylltwch â ni i ddysgu mwy.”