Partneru â’r Gwasanaeth Arian a Phensiynau i feithrin sgiliau i reoli arian ar-lein

Gan ddechrau ym mis Hydref 2024, fe wnaeth Cymunedau Digidol Cymru: Iechyd, Hyder a Lles Digidol (CDC) bartneru â’r Gwasanaeth Arian a Phensiynau i gyflwyno cyfres o weminarau. Canolbwyntiodd y rhain ar gynhwysiant digidol ac ariannol, a manteision rheoli arian ar-lein.

Mae CDC yn deall bod gan y cymunedau a gefnogwn anghenion digidol ac ariannol amrywiol, yn ogystal â gwahanol lefelau o allu. I adlewyrchu hyn, fe wnaethon ni greu a chyflwyno gweminarau wedi’u teilwra i gynulleidfaoedd penodol, yn seiliedig ar grwpiau ein meysydd thematig. Ein meysydd thematig yw Iechyd, Gofal Cymdeithasol, Tai Cymdeithasol, Pobl Hŷn, a Chymunedau Lleiafrifoedd Ethnig – gan gynnwys Cymunedau Sipsiwn, Roma a Theithwyr.

Ein nod oedd arfogi’r rhai sy’n gweithio gydag unigolion yn y cymunedau hyn â dealltwriaeth ddyfnach o gynhwysiant digidol, a sut mae’n berthnasol i gynhwysiant ariannol.

Mae llawer o fanteision i fod yn ariannol lythrennog ar-lein – o ddod o hyd i eitemau gwell eu gwerth neu dariffau cyfleustodau, i gael mynediad at wasanaethau fel budd-daliadau neu arweiniad ariannol, gan gynnwys yr hyn a gaiff ei gynnig gan y Gwasanaeth Arian a Phensiynau.

Ond heb y sgiliau digidol na’r hyder angenrheidiol i reoli arian na cheisio arweiniad ar-lein, mae llawer o bobl mewn perygl o gael eu gadael ar ôl a’u hallgáu’n ddigidol.

Yn ystod y gyfres hon o weminarau, hyfforddwyd 96 o fynychwyr i helpu eraill i oresgyn rhwystrau a magu hyder wrth reoli arian ar-lein.

Fe wnaethon ni arddangos yr offer a’r gwasanaethau amhrisiadwy sydd ar gael ar hyn o bryd i gefnogi sgiliau digidol a mynd i’r afael â’r gagendor digidol. Roedd y rhain yn cynnwys DataMap Cymru Llywodraeth Cymru ac adnoddau’r Good Things Foundation, sef y Rhwydwaith Cynhwysiant Digidol Cenedlaethol, y Banc Data Cenedlaethol, y Banc Dyfeisiau Cenedlaethol, a phlatfform Learn My Way.

Amlygodd Lawrence Davies, Rheolwr Partneriaeth Cymru ar gyfer y Gwasanaeth Arian a Phensiynau, y cysylltiad hollbwysig rhwng cynhwysiant digidol ac ariannol:

“Mae mynediad digidol yn hanfodol ar gyfer cynhwysiant ariannol, gan ei fod yn galluogi unigolion i ddefnyddio gwasanaethau fel bancio, cynilion a chredyd, ac mae hyd yn oed yn eu helpu i gael mynediad at fudd-daliadau. Heb offer a sgiliau digidol, gall pobl gael eu heithrio o gyfleoedd sy’n gwella eu lles ariannol. Mae pontio’r gagendor digidol yn grymuso pawb i reoli eu harian a gwneud penderfyniadau gwybodus, gan leihau anghydraddoldeb a meithrin gwytnwch.” 

Drwy gydol y gyfres, dangosodd y Gwasanaeth Arian a Phensiynau ei raglen Arweinwyr Arian, sydd am ddim i’w defnyddio gan unrhyw sefydliad, tîm neu ymarferydd sy’n rhoi arweiniad ariannol.

Fe wnaeth y tîm hefyd arddangos yn fanwl y wefan MoneyHelper, sy’n cynnig arweiniad diduedd a rhad ac am ddim ar arian a phensiynau, gyda chymorth y Llywodraeth.

Roedd yr offer ar MoneyHelper a ddangoswyd yn cynnwys y cynllunydd cyllideb a chyfrifiannell y budd-daliadau.

O ganlyniad i’r bartneriaeth rhwng CDC a’r Gwasanaeth Arian a Phensiynau, dangosodd y gyfres o weminarau i’r mynychwyr sut mae meithrin sgiliau digidol a hyder yn grymuso unigolion i wneud y gorau o offer ariannol pwerus ar-lein.

Dywedodd un mynychwr am y gyfres:

“Roedd yn addysgiadol iawn a byddaf yn rhannu’r adnoddau gyda fy nhîm.”  

Tra tynnodd un arall sylw at werth deall ymarferoldeb cefnogi eraill:

“Mae’n bwysig bod yn amyneddgar gyda phobl, a dangos amrywiaeth o offer i fagu hyder.”  

Gallwch ddod o hyd i ragor o wybodaeth am gynnwys y gyfres yn y ddogfen ganllaw hon. Rydyn ni hefyd yn cynnal gweminar ddilynol mewn partneriaeth â’r Gwasanaeth Arian a Phensiynau ym mis Mehefin ar gynhwysiant digidol ac ariannol. Cofrestrwch ar ei chyfer yma.